சக பயணி-1

சுமார் 400 கி.மீ தூரத்தை பகல் நேரத்தில், இரயில் பயணத்தில் அதுவும் கோடை தொடங்கிய நேரத்தில் பயணித்துக் கடக்க வேண்டிய சந்தர்ப்பம். சக பயணிகள் இது மாதிரியான தருணங்களில் பொழுது போக்க மிகவும் உதவுவார்கள். கையில் வைத்திருக்கும் வார, மாத சஞ்சிகைகள், நாளிதழ்கள் கைமாறும். அரசியல், சினிமா, சமூக அவலங்கள், சமூக அக்கறைகள் என உரையாடல்களும் களம் மாறி மாறி நேரம் நழுவும்.


மிக அருகில் அமர்ந்திருக்கும் ஒரு சக பயணி சமூகம் சார்ந்த அவரது கருத்தை நிறுவிடவும், நாம் அதனுடன் ஒத்துப் போவதும் இல்லை முரண்படுவதுமாக பல சமயம் இலக்கில்லாது., பற்பல சந்தர்ப்பங்களில் உரையாடும் கருத்துக்கு நம் தரப்பிலோ அல்லது அவர் தரப்பிலோ வலுவற்ற சான்றுகள் ஏதுமே இல்லாது உரையாடல் அந்த இரயில் வண்டியை விட வேகமாக பயணிக்கும். முரண்பட்ட கருத்துக்களே ஆயினும் இருவருக்கும் இடையே ஒரு மெல்லிய கண்ணியம் ஒட்டிக் கொண்டிருக்கும். அது ஒருவரை ஒருவர் முதன் முறை அறிந்துள்ளோம் என்பதால்.

எனக்கு இப்படியான பயணத்தில் வாய்த்த சக பயணி., அந்தப் பயணம் முழுமைக்கும் ஒரே சங்கதியைப் பற்றி உரையாடி வந்தது எனக்கான ஆச்சரியம். அவருக்கு 70 வயது கடந்திருக்கும் ஏன் 80 கூட இருக்கலாம். பாசஞ்சர் லிஸ்டில் பார்த்திருந்தால் தெரிந்து இருக்கும்.. அவர் தான் உரையாடலைத் தொடங்கினார்

“உங்களுக்கு காந்தியக் கொள்கைகள் மீது நம்பிக்கை இருக்கின்றதா”

நான் இந்தக் கேள்விக்கு எப்பவுமே உற்சாகமாக ஆமாம் என தலையாட்டி விடுவேன் அன்றைக்கு என்னவோ பதில் கேள்வி கேட்டேன்

“காந்தியக் கொள்கைகள் என திட்டவட்டமாக எதைச் சொல்லுகின்றீர்கள் எனத் தெரிந்து கொள்ளலாமா”
(பயணம் தொடரும்)

தேசிகனுக்குப் போட்டியாக

தலைப்பைப் பார்த்து விட்டு அவர் என்னவோ தேர்தலில் போட்டியிடுவது போலவும் நான் அதே தொகுதியில் மனு தாக்கல் செய்திருப்பது போலவும் அர்த்தம் செய்ய வேண்டாம்

பல நாள் முன்பு தேசிகன் மாயாஜாலக் கட்டம் என அவருடைய வலையில் வேதாளம் மூலமாக சொல்லியிருந்தார் http://desikan.com/blog/?p=213

அதே போல் இன்னொன்னு அமைக்க இயலுமானு கேட்டிருந்தார்

ஒன்றென்ன இரண்டு அமைத்து விட்டேன் தேசிகன்.

8	19	18
25	15	5
12	11	22

Eight (5)	Nineteen (8)	Eighteen (8)
Twenty five (10)	Fifteen (7)	Five (4)
Twelve (6)	Eleven (6)	Twenty two (9)

118	122	105
102	115	128
125	108	112

One hundred and eighteen (21)	One hundred and twenty two (22)	One hundred and five (17)
One hundred and two(16)	One hundred and fifteen(20)	One hundred and twenty eight(24)
One hundred and twenty five(23)	One hundred and eight(18)	One hundred and twelve(19)

யார் மாதிரி ஆளுக்கு ஓட்டுப் போடணும்

காமராஜருக்கு நிகரான தொண்டுள்ளமும், நேர்மையும், கண்ணியமும், தேசப் பற்றும் , எளிமையும் உள்ளவரா உங்களிடம் வாக்கு கேட்டு வரும் வேட்பாளர் என சிந்தியுங்கள். இல்லையெனில் நிராகரியுங்கள்.

துக்ளக் 30 மார்ச் 2011

பொங்கரில் நுழைந்து வாவிபங்கயம் துழாவி

பைங்கடி மயிலைமுல்லை மல்லிகைப் பந்தர்தாவி

கொந்தலர் மணம் கூட்டுண்டு குளிர்ந்து

மெல்லென்று தென்றல் அங்கங்கே கலைகள்தேரும்

அறிவன்போல் இயங்கும் அன்றே'

இந்த திருவிளையாடல் புராண பாடலுக்கும் இந்தப் பதிவின் தலைப்புக்கும் என்ன தொடர்பு இருக்கும்

பாடல் ஓர் அறிவன் எப்படி அறிவைத் தேடுவான் என்பதைக் குறித்து. தென்றல் எப்படி பல மலர் வாசனை , குளத்தின் குளிர்ச்சி இதெல்லாம் தேடி வந்து வீசுதோ அது போல அறிவன் இயங்குவான். இது அறிவனுக்குப் பொருந்தும்.

அதாவது தேடிப் பெறுவது

கூகிளில் தேடிக் கிடைக்கவில்லை என சாருநிவேதிதா துக்ளக்கில் சொல்லியிருக்கிறார்

என்ன கிடைக்கவில்லையாம். இதோ 1983 ம் வருடம் மறைந்த வைணவப் பெருந்தகை பிரதிவாதம் பயங்கரம் அண்ணங்கராச்சாரியார் பற்றிய விபரம் கிடைக்கவில்லையாம்.. அதற்கு இரண்டு நாள் சிரமப்பட்டதாக வேறு சொல்லியிருக்கிறார்

இதோ இந்த சமீபத்திய காலத்தில் மறைந்த ஒருவரின் விபரம் கிடைக்காமலா போகும்.. கூகிளில் நீங்கள் என்ன தேடுவீர்களோ அது தான் கிடைக்கும் என என் நண்பர் நலம் பெறுக அடிக்கடி கூறுவார்.

இந்த சுட்டியில் அன்னார் ஜூன் 21 1983 அன்று திருநாடு ஏகினார் எனும் தகவல் முதல் தேடலிலேயே கிடைக்கிறது

http://www.acharya.org/acharya/pba/Vaibhavam-PBA-TSR.htm

அன்னார் 1207 புத்தகங்கள் எழுதியிருக்கிறார் என மிகத் துல்லியமாக தேடித் தகவல் பெற இயன்றவருக்கு அன்னார் பிறந்தது, இறந்தது தேதி விபரங்களை தேடிப் பெற முடியவில்லையா ? ஆச்சரியம் தான்

பிரதிவாதி பயங்கரம் அண்ணங்கராச்சாரியார் அவர்களின் பேட்டி மார்ச் 1979 கீதாச்சாரியான் இதழில் வெளியாகியிருக்கிறது. துக்ளக்கில் சாருவின் கட்டுரையில் காணப்படும் தகவல்கள் அங்கே முழுவதும் இருக்கு

http://thiruvonum.wordpress.com/2010/11/01/an-interview-with-pba-swamy-1979/

எங்கே கிடைக்கும் அரிய பொக்கிஷம் என வேறு கேட்டிருக்கிறார். ரொம்ப தேடிக் களைத்தவருக்கு உதவிட வேண்டாமோ

http://www.maransdog.org/document/

இந்த சுட்டியில் டிசிஏ வெங்கடேசன் ஸ்வாமி என்பவர் தொகுத்திருக்கிறார் பயங்கரம் அண்ணங்கராச்சாரியாரின் வியாக்கானங்கள் அனைத்தும் இங்கே பிடிஎஃப் கோப்பாக கிடைக்கிறது

இந்த சுட்டியில் உள்ள ஓர் உப சுட்டியில் அண்ணங்கராச்சாரியாரின் சுயசரிதை (அவரது மொழியில் தன் சரிதை) சுமார் 23 எம்பி அளவில் பிடிஎஃப் கோப்பாக இலவச டௌன் லோடுக்கு கிடைக்கிறது

இந்த சுய சரிதை 1956ல் முதல் பதிப்பாகவும் 1970 ல் மறு பதிப்பாகவும் வந்திருக்கிறது

உப சுட்டி :http://www.maransdog.org/doc/VEDICS/TSS-PBA.zip

பிரதிவாதி பயங்கரம் அண்ணங்கராச்சாரியாரை குறித்து எழுத ஆசை எனச் சொல்லியிருந்தால். துக்ளக் ஆசிரியர் சோ. இராமசாமி அவர்களிடமே நிறைய குறிப்புதவிகள் கிடைத்திருக்கும்

இந்து மஹா சமுத்திரம், மஹாபாரதம் பேசுகிறது, வால்மீகி இராமாயணம் என நூல்களில் பல ரெபரென்ஸ் மூலம் தனது அத்தாரிட்டேட்டிவ் ரைட்டிங்கை மீண்டும் நிரூபித்திருக்கும் திரு சோ. ராமசாமி தனது பத்திரிக்கையில் வெளிவரும் ஒரு கட்டுரையின் தரம் குறித்து கவலைப்ப்டமாட்டாரா. அப்படி ஒரு கட்டுரை மிகவும் சரியான தகவல்களுடன் இருக்க வேண்டும் என நினைக்க மாட்டாரா ?

கண்டிப்பாக நினைப்பார் என நம்பிக்கை கொள்கிறேன்.

இந்தப் பதிவு குறித்த தகவலை அவருக்கு மின்னஞ்சல் செய்கிறேன்

34TH BOOK FAIR -CHENNAI - PART 5

சரித்திரம் புத்தகங்கள் வழியாக அறியப்படுவதை விட சினிமாவின் வழியாக அதிகம் அறியப்படுகிறது. விஷுவல் மீடியாவுக்கு இருக்கும் பலம். அதிலே சொல்லப்படுவது மிகைப்படுத்தலானாலும்., சரிவர சான்றுகள் சரி பார்த்து காட்சிகள் அமைக்கப்படாவிடினும் அல்லது சினிமாவுக்கான வியாபார நோக்கத்தில் செய்யப்படும் சமரசங்களில் சரித்திரம் திரிந்து போகவும் வாய்ப்புண்டு.. ஆனாலும் சரித்திர கதாபாத்திரங்களை ஏற்று நடிப்பவர்கள் அதற்கான முத்திரையைப் பெற்று விடுகிறார்கள்

நான் அரசு சார்ந்த பணியில் இருந்த காலம். எங்கள் துறையின் தலைமை நிர்வாக அலுவலரின் மாமனார் இசபெல் மருத்துவமனையில் குடல் நோய் காரணமாக அனுமதிக்கப்பட்டிருந்தார். அவருக்கு அறுவை சிகிச்சை நடந்திருந்தது. அவரைப் பார்ப்பதற்காக நான் சென்றிருந்தேன். அவர் திரைப்படத் துறையில் புகழ் பெற்ற ஸ்டில் போட்டாகிராபர் ; ஸ்டில் சாரதி.. சிவாஜி , எம்.ஜி.ஆர் காலத்து திரை ஆசாமி

அவரைக் காண தயாரிப்பாளர் பாலாஜியும் வந்திருந்தார். சாரதி அவர்கள் என்னைக் காட்டி பாலாஜியிடம், " சார் சிவாஜி சாரின் பரம ரசிகர் " என அறிமுகம் செய்து வைத்தார்

நான் பாலாஜியிடம் ஒரு சம்ப்ரதாயக கேள்வி கேட்டேன், " நீங்க நடிச்சதிலேயே உங்களுக்கு பிடிச்ச கேரக்டர் என்ன?"

"கப்பலோட்டிய தமிழனில் வாஞ்சிநாதன் காரக்டர்'

வாஞ்சிநாதன் இத்தனை குண்டாக இருந்திருப்பாரா என்ற என் சந்தேகம் ரொம்ப நாள் கழித்து தீர்கிறது

காலச்சுவடு பதிப்பகம்‍ ஆஷ் கொலையும் இந்திய புரட்சி இயக்கமும் எனும் புத்தகத்தால்

இந்தப் புத்தகம் வாங்க மேற்சொன்ன நிகழ்ச்சி மட்டும் காரணமல்ல.

ஆஷ் படுகொலையினை பாரதி ஒரு தனிமனித கொலையாக கண்டு வெறுத்தான் என்பதும் தான். அது எனக்கு உடன்பட்ட கருத்தும் தான்

இது குறித்து பாரதி ஒரு நீண்ட ஆங்கிலக் கட்டுரை எழுதியிருந்தான். அதனை முன்பே படித்திருக்கிறேன். அது இந்த நூலில் மிகச் சிறப்பாக பதியப்பட்டுள்ளது

பாரதி ஆங்கிலத்தில் கட்டுரை எழுதியுள்ளார் என்பதை ஒரு ரிலவன்ட் ரெஃபெரென்ஸாகத்தான் இங்கே குறிப்பிடுகிறேனேயல்லாது சர்வதேச அளவில் விருது வாங்க ரொம்ப சீரியசாக கனவு கண்டு கொண்டிருப்போரின் பொது அறிவு குறித்து நான் மறைமுகமாக ஏதும் குறிப்பிடவில்லை எனத் தெளிவு கொள்க‌

ஆஷ் கொலையும் இந்தியப் புரட்சி இயக்கமும் என்ற ஆக்கத்திற்காக நான் அதன் ஆசிரியர் திரு ஆ. சிவசுப்ரமணியன் அவர்களுக்கு மிகவும் கடமைப்பட்டவனாகிறேன்.

இது போன்ற ஆக்கங்களில் எத்தனை எளிமை கை கூட வேண்டுமோ அத்தனை எளிமையினையும்., எத்தனை கட்டுக் கோப்பு அவசியமோ அதனையும் சேர்த்து கொடுத்துள்ளார். சான்றுகளை மிகக் கோர்வையாக வரிசைப்படுத்தி தந்துள்ளார்

இந்த புத்தகத்தைப் படித்துவிட்டு அவரைத் தொடர்பு கொண்டு பேசினேன். பேசும் போது பல ஆண்டுகளுக்கு முன்பு நெல்லை சென்ற போது எனது நண்பர் மு. பாண்டியன் என்னை ஆஷ் துரையின் கல்லறைக்கு அழைத்துச் சென்ற சம்பவத்தையும் பகிர்ந்து கொண்டேன்.

இங்கே நான் தந்துள்ள படம் ஆஷ் கல்லறையின் படம்

அந்த கல்லறை அமைந்துள்ள தேவாலயத்திற்கு Christ Church என பெயர் இருந்தாலும் அது இங்கிலீஷ் சர்ச் என்றே அழைக்கப்படுகிறது

அங்கே இன்றளவும் ஆங்கிலத்தில் தான் சர்வீஸ் நடக்கிறது என்ற தகவலை திரு. சிவசுப்ரமணியன் சொன்னார்.

எனது பள்ளிக் காலத்தில் எங்கள் பள்ளிக்கு பக்கத்து வீட்டில் தான் வ.உ. சிதம்பரம் அவர்களின் புதல்வர் திரு வாலேசுவரன் வசித்தார் எனச் சொல்லி அப்போது பள்ளிப் பருவம் ஆதலால் அவருடன் உரையாடி வ.உ.சி அவர்களைக் குறித்து தெரிந்து கொள்ளும் ஆர்வம் இருந்திருக்கவில்லை என சொன்னபோது,

"நீங்கள் அதிகம் ஒன்றும் தவறவிடவில்லை . வ.உ.சி மறைந்த போது திரு. வாலேசுவரன் அவர்கள் மிகவும் இளம் பிராயத்தவர்தான்" என்ற யதார்த்தத்தையும் சொன்னார் திரு .சிவசுப்பிரமணியன்

நான் இந்தப் புத்தகத்தை அதிகம் சிலாகித்துக் கொண்டே பின்னட்டையினைக் கவனித்தேன்.

சரித்திர சான்றுகளைச் சார்ந்த புனர்நிர்மாணம் என்ற அறிவுலக ஒழுக்கத்திற்கு இது ஒரு அபூர்வ உதாரணம். முன்னெண்ணங்களிலிருந்து முற்றாக பெற்ற விடுதலையும் விஞ்ஞான ரீதியான ஆராய்ச்சியில் அசைக்க முடியாத நம்பிக்கையும் கொண்ட உதாரணம்

இப்படி சொல்ல வேறு யாரால் முடியும் .. சாட்சாத் சுந்தர ராமசாமி தான்

பக்கம் பக்கமாய் 5

எனக்கு "அ"னாவுக்கும் ராசி அதிகம். இந்த ராசியில் அநிருத்தன்,அனானிமஸ் கமென்ட்டர்கள், அனாமதேயங்கள் போன்றவையும் அடக்கம். கவனிக்க இங்கே.

இதல்லாமல் "அ"னாவோடு அற்புதம், அம்சம், அட்டகாசம் என்பதான சுபச் செய்திகளும் உண்டு.. இந்தப் பதிவு சுபச் செய்தி குறித்து.

எப்போதோ அங்கும் இங்குமாய் வாசித்து அனுபவித்த அசோகமித்திரன் அவர்களின் கட்டுரைகளின் அருமையான தொகுப்பு . இது இரண்டாம் பாகம். முழு தொகுப்பையும் இங்கே சிலாகித்துக் கொண்டிருந்தால்.. அதற்கு மட்டுமே நேரம் முழுமையும் தேவைப்படும்.

சில சில இடங்களைத் தொட்டுக் காட்டினால் படிப்பார்வம் உள்ளவர்க்ள் தேடிப் போய் வாங்கி வந்து படித்துவிடுவார்கள்..

மிகத் தீவிரமான சங்கதிகளைக் கூட எளிமையாகச் சொல்ல இயலும் என்பதற்கு அசோகமித்திரன் அவர்கள் ஒரு எடுத்துக்காட்டு.. இன்னும் அழுத்தமாகச் சொல்லப்போனால் தீவிரம் என்பதாக சிலர் ஜல்லியடித்துக்கொண்டிருக்கிறார்கள்.

எளிமையாகத் தான் சொல்லவேண்டும் என்பது அவர் மறைமுகமாக உரைக்கும் சங்கதி

வில்லியம் ஃபாக்னர் குறித்த கட்டுரையில்

ஃபாக்னர் இறுதி வரையில் தம்முடைய நாவல்களில் குரூரமும் விபரீதச் சேர்க்கையும் பாப உணர்ச்சியும் பயங்கரமும் திசையற்ற மனநிலையும் பற்றியே அதிகம் எழுதினார். ஆனால் மிகவும் சூட்சுமமான பார்வை கொண்டு மனித வாழ்கையின் அடித் தளத்தையே பிரதிபலிக்க எழுதினார் என்பதும் எல்லோரும் ஒப்புக் கொள்ளக் கூடியது. மனிதப் பிறப்பின் அபத்த நிலையும், இன்றைய சூழ்நிலையை எதிர்க்க சக்தியற்றவனாக மனிதன் இருப்பதுவும் தான் அவர் எழுதியதன் சாரம் என்பார்கள் (The absurdity of the human condition and moder man's inability to cope with existence)

விமர்சனம் எழுதுவதற்கு முன்பு நிறைய உழைக்க வேண்டும் என்பது என் சித்தாந்தம். தகவல்கள் அளவிலும் . கோணம், பர்சப்ஷன் என்பதிலும் ஒரு தேர்ந்த வாதத்தின் கல்யாண குணங்கள் கொண்டு விமர்சனத்தில் ஸ்ருதி கூட வேண்டும். இதில் காம்ப்ரமைஸ் செய்து கொள்வதில்லை என ஒரு பிடிவாதம் வைத்திருக்கிறேன்.

நான் படித்த ப்ரேமித்த விமர்சனங்களில் க.நா.சு அவர்களுடையதை முதன்மையானதெனச் சொல்லலாம்

க.நா.சு அவர்கள் குறித்த அசோகமித்திரன் அவர்களது கட்டுரைகளிலிருந்து சில வரிகளைக் கவனிக்கலாம்.

அவர் அறிவுபூர்வமாக தன் கணிப்புகளை எடுத்துக் கூறுவது அதற்கு மறுப்பு கூற இடமில்லாமல் அவர் வாதங்கள் இருப்பதால் எவ்வளவோ பேருக்கு கோபமூட்டியிருக்கிறது. கோப மூட்டுகிறது

க.நா.சு வின் பரிஷார்த்த முயற்சிகள் குறித்து அசோகமித்திரனின் வரிகள்

எவ்வளவு எளிமையாகவும் ஆழமானதும் என கவனியுங்கள்

ஒருவர் முதன் முதலாக ஏதோ கூறியிருக்கிறார் என்பதால் மட்டும் அது நித்ய சத்யமாக ஏற்றுக் கொள்ளப்படுவது இல்லை. ஆனால் ஒருவர் எடுத்துக் கூறுவதால்தான் அப்பொருள் குறித்து மேற்கொண்டு பரிசோதனை நடத்த ஒரு தளம் அமைகிறது. ஆதலால் முதன்முதலாக ஒன்றைப் பற்றி ஒருவர் கூறும் கருத்தும் கணிப்பும் முக்கியத்துவமும் மதிப்பும் பெறத்தான் செய்கின்றன‌

கிழக்குப் பதிப்பகத்தை பாராட்டுகிறேன். நேர்த்தியான அச்சு. மிகச் சிறப்பாக சொல்ல வேண்டுமென்றால் தமிழில் இன்டெக்ஸ் அமைத்து புத்தகங்கள் வருவதில்லை. ஆனால் இந்த புத்தகம் மிகச் சிறப்பாக இன்டெக்ஸ் செய்யப்பட்டுள்ளது. ரெஃப்ரன்ஸ்க்கு மிகவும் வசதியாக இருக்கும்.

வெல்டன் கிழக்கு

சுஜாதாவின் கணையாழி கடைசிப் பக்கத் தொகுப்பின் முன்னுரையில் கவிஞர் மனுஷ்யபுத்திரன் சொன்னது நினைவுக்கு வருகிறது

சுஜாதா இந்தப் பத்திகளில் எத்தனை விதமான பொருள்கள் குறித்தும், ஆளுமைகள் குறித்தும் , படைப்புகள் குறித்தும் பேசியிருக்கிறார் என ஒரு பொருளடைவு தயாரித்தால் அது மிகவும் பிரமிப்பூட்டுவதாக இருக்கும்,

அது போல அசோகமித்திரனின் கட்டுரைகளின் தொகுப்பில் உள்ள இன்டக்ஸைக் கவனிக்கும் போது பிரமிப்பும் மதிப்பும் உண்டாகிறது.

பக்கம் பக்கமாய் 4

சென்னையில் நான் மிகவும் விரும்பி, மீண்டும் மீண்டும் செல்லும் இடங்கள் இரண்டு; எழும்பூரில் உள்ள அரசு அருங்காட்சியகம், புனித

ஜார்ஜ் கோட்டையில் உள்ள அருங்காட்சியகம். அது போல ஒரு அருங்காட்சியகத்துக்குள் சென்று வந்த உணர்வு தொ.பரமசிவத்தின்

"பண்பாட்டு அசைவுகள்" படித்து முடித்தபின்.

இந்தப் புத்தகத்தை கமல்ஹாசன் சிலாகித்ததாயும் நன்றாக இருப்பதாகவும் சொல்லி கார்த்திக் அனுப்பி வைத்திருந்தார்.

இளம் மனைவி ஒருத்தி., கருவுற்றிருக்கிறார்.. பாவம் கணவன் மரணமடைந்து விடுகிறான். அந்த துக்க வீட்டில் அந்தப் பெண்

கருவுற்றிருக்கும் செய்தியைச் சொல்லும் நாகரீகத்தினைக் குறித்த பதிவு என்னை யோசிக்க வைத்தது.

இன்றைக்கு தவிர்க்க வேண்டிய சங்கதிகளையே தினசரி பிசினஸ் எடிக்கட்ஸ் எனும் பெயரில் கூச்சப்படாமல் செய்து கொண்டிருக்கிறோம்.. அதற்கு மேனர்ஸ் என பெயர் கொடுத்திருக்கிறோம்

தமிழனிடம் தாலி பழக்கம் இருந்ததா இந்த கேள்விக்கு "இல்லை" எனும் முன் முடிவுடன் சான்றுகள் அணுகப்பட்டிருக்கின்றன.. இதற்கு தொ.ப வும் விலக்கில்ல்லை

பண்டைக் காலத்தில் தாலி இருந்திருக்க வேண்டும் என நான் யூகிக்கிறேன் காரணம் ....

அயோத்தியா காண்டத்தில் நகர் நீங்கு படலத்தில் ஒரு காட்சி, தசரதன் கைகேயியை பார்த்து சொல்வதாக‌

பழிக்கும் நாணாய்; மாணாப் பாவி! இனி என் பல? உன்

கழுத்தின் நாண், உன் மகற்குக் காப்பின் நாண் ஆம்

இங்கே கழுத்தின் நாண் என்பது தாலியைக் குறிப்பதாக இருக்கலாமோ

ஆனால் சீதை இராமன் திருமணத்தில் தாலி அணிவிக்கு சங்கதியினை கம்பன் சொல்லவில்லை.. ஆனாலும் சீதையின் தாலி குறித்து

அனுமன் சொல்வதாக பாடல்

வாடி வதங்கி துயரம் நிறைந்த கோலத்தில் அனுமன் சீதையைப் பார்க்கிறான்

அவள் அணிகலன்களைத் துறந்தவளாக இருக்கிறார்

இற்றை நாள் அளவும் அன்னாய் அன்று நீ இழித்து நீத்த

மற்றை நல் அணிகள் காண்உன் மங்கலம் காத்த மன்னோ

நீ தாலியைத் தவிர(மற்றை) எல்லாவற்றையும் கழற்றி வீசி விட்டாய்

சிலப்பதிகாரத்தில் துயரக் கோலத்தில் கண்ணகி

"மஙகல அணியிற்பிறிதணி

மகிழாள்"

கோவலனைப் பிரிந்து வாடும் கண்ணகியும் இப்படித்தான்

தாலி ஆராய்ச்சியில் கண்ணதாசன், மபொசி ஈடுபட்டார்கள் என தொப பதிவு செய்திருக்கிறார்

இவர்களுக்கு இந்தப் பாடல்கள் தெரியாதா என்ன. தெரிந்திருக்கும் ஆனால்

It is a sort of convinience to get settled over a conceived opinion

திராவிட இயக்க வரலாறு- ‍முத்துக்குமார் ஒரு பார்வை

கிழக்கு பதிப்பகம் பதிப்பித்துள்ள திராவிட இயக்க வரலாறு இரண்டு பாகங்கள்.. புத்தகம் வாங்கிய விபரத்தினை எனது முந்தைய பதிவில் சொல்லியிருந்தேன்.

அந்த பதிவில் இந்த புத்தகத்திற்கான விரிவான விமர்சனம் எழுத வேண்டும் என்ற எனது ஆசையினையும் சொல்லியிருந்தேன்.

வரலாற்று நிகழ்வுகளைப் புத்தக வடிவில் பதியும் போது, ஒரு எழுத்தாளருக்கு உருவாகும் கருத்துப் பிம்பங்கள், யூகங்கள், சமூக நிகழ்வுகள் மீது தான் கொண்ட கருத்துகள் இந்த கண்ணோட்டத்தில் புத்தகம் செல்லும்.. நூலாசிரியர் முத்துக்குமார் அப்படி அல்லாது..

நிகழ்வுகளை நிகழ்வுகளாகவே சொல்லியிருப்பதை பாராட்ட வேண்டும் சபாஷ் முத்துக்குமார்

திராவிட இயக்க வரலாற்றினை எங்கிருந்து துவங்குவது என யோசித்த நிலையில்

இது பிராமணர் , பிராமணர் அல்லாதார் எனும் நிலையில் தொடங்கலாம் என்ற விபரத்தினை சொல்லி

1909 தொடங்கப்பட்ட சென்னை பிராமணர் அல்லாதார் சங்கத்தின் பிறப்பில் புத்தகத்தை தொடங்கியுள்ளார்.. இது புத்தக ஆசிரியரின் முன்னுரையில்..

புத்தகத்தின் முதல் அத்தியாயத்தில் காலம் இதுவென குறிப்பிடாத ஆனால் இந்தியாவில் ஆங்கிலேயர் ஆண்டு கொண்டிருந்த காலம் என புரிந்து கொள்ளும்படியான ஒரு சம்பவத்துடன் புத்தகம் தொடங்குகிறது.. ஆங்கிலேயர்கள் ஏன் பிராமணர்களை வேலைக்கு வைத்துக் கொண்டனர் என்பதற்காக உத்தமதானபுரத்தில் நடந்த (! ? ) ஒரு சம்பவம் சொல்லியுள்ளார் முத்துக்குமார்.

சபாஷ்.

இந்த புத்தகம் எழுதுவதற்காக "ஆய்வுக்கும் ஒப்பீட்டு ஆய்வுக்கும்" என 50 புத்தகங்களை முதல் பாகத்திலும் 195 புத்தகங்களை இரண்டாம் பாகத்திலும் Bibliography குறிப்பிடும் திரு. முத்துக்குமாரின் மேலான கவனத்துக்கு

1982 ம் ஆண்டு அமைக்கப்பட்ட பிற்படுத்தப்பட்டோர் நலம் இரண்டாம் கமிஷனின் அறிக்கையின் முதல் பாகம் பக்கம் 6 மற்றும் 7 ல் காணப்படும் வாசகங்களை கவனத்தில் கொண்டு வர விழைகிறேன். அந்த அறிக்கை சொல்லும் காலத்தினையும் கவனத்தில் கொள்ள் வேண்டும்

அந்த கமிஷனின் தலைவர் அம்பாசங்கர் ஐ.ஏ.எஸ்

"During 1853 the British Government found the virtual monopoly of a single caste in Public Service. The reveneue Establishment in Nellore District was controlled by 49 Brahmins all from Same family" (Ambasankar Commission report Vol 1 page 6)

"Between 1894 and 1904 in Provincial Civil Service out of 16 Officers 15 were Brahmins; amonth 21 Assistant Engineers 17 were brahmins" (Ambasankar Commission report Vol 1 page 7)

இந்த விபரங்களையும் சேகரித்து புத்தகத்தில் பதிந்திருக்கலாம் என கருதுகிறேன்.

ஆங்கில ஆட்சியில் பிராமணர்கள் முக்கியத்துவம் பெற்றார்கள் எனும் கருத்தை பதிந்திருக்கும் நூலாசிரியரின் கவனத்துக்கு அதே ஆங்கிலேயர் ஆட்சியின் ஆவணத்தில் பல்வேறு சாதிகளுக்கும் முக்கியத்துவம் அளிக்க மாவட்ட ஆட்சித் தலைவர்கள் அறிவுறுத்தப்பட்ட சான்றினையும் தெரிவிக்க கடமைப்பட்டவனாகிறேன்

"Collectors should be careful to see that the subordinate appointments in their districts are not monopolised by members of a few influential families. Endeavour should always be to divide the principal appointments in each district among the several caste

[Board of Revenue Proceedings dated 9th March 1854(B.S.O 128.2 of 1854)]

முத்துக்குமாரின் ரெபரன்ஸ் பட்டியலில் பிறரின் புத்தகங்கள் தலைவர்களின் சரிதங்கள் இடம் பெற்றுள்ளன .. ஆனால் அரசு ஆவணத் தொகுப்புகள் எதுவும் காணப்படவில்லை .. இது சற்றே அல்ல நிறையவே வியப்பளிக்கிறது..

இந்திய வரலாற்றில் மிக முக்கிய நிகழ்வான மான்டேகு செம்ஸ்போர்ட் அறிக்கையினைக் குறித்து முத்துக்குமாரின் பதிவுகளைப் மிகவும் பாராட்ட வேண்டும்.. ஆனால் மான்ட்போர்ட் அறிக்கை எனப்படும் இந்த அறிக்கையின் முக்கிய சங்கதிகள் 3 என குறிப்பிடுகிறார் நூலாசிரியர்.

ஆனால் மான்ட்போர்ட் அறிக்கையின் முக்கிய சங்கதிகள் 4

1. There should be as far as possible, complete popular control in Local Bodies and the largest possible independences for them of outside control

2. The provinces are the domain in which the earlier steps towards the progressive realisation of responsible government should be taken. Some measures of responsibility should be given at once, and our aim is to give complete responsibility as soon as the condition permit. This

involves at once giving the provinces the largest measure of independence, legeslative, administrative and financial of the Government of India which is compatible with the due discharge by he latter of its own responsibilities.

3. The Government of India must remain wholly responsible to Parliament and saving such responsibility its authority in essential maaters must remain undisputable pending experience of the effect of the changes now to be introduced in the provinces. In the meantime the Indian Legislative Concil should be enlarged and made more representative and its opportunities of criticizing the Government increased

4. In proportion as the foregoing changes take effect, the contrl of Parliament and the Secretary of State over the Government of India and provincial governments must be relaxed

இந்திய அரசமைப்பின் வரலாற்றினை குறித்த ஒரு சிறந்த புத்தகத் தொகுப்பு

Indian Consitutional Documents By A.C Banerjee இதனை அவசியம் வாசிக்க வேண்டும் என திரு. முத்துக்குமாரினை அன்புடன் வேண்டுகிறேன்.

அதே போல் மான்டேகுவின் மனைவி வெனடியா மான்டேகு தொகுத்த மான்டேகுவின் இந்தியன் டைரி‍ ‍இந்த புத்தகமும் முத்துக்குமார் படிக்க வேண்டும்.

மான்ட்போர்ட் அறிக்கையினை தயார் செய்ய மிகவும் பிரயத்தனப்பட்டிருப்பதனை அந்த டைரி வடிவத்தில் காணலாம் .. சாம்பிளுக்கு

ஒன்று பார்க்கலாம்

ஏப்ரல் 16, 1918 ம் தேதியின் டைரி வாசகம்

This Morning Duke Roberts and I Went on hammering away at the report, pruning, altering , changing, every day it gets better; but this work from ten in the morning till twelve in night, with also some work before breakfast, is very very very waering. If the work was hard the report

ranks, "with the great state papers which are landmarks of constitutional progress in the history of the British Empire". Even a critic like Craddoc is made to concede that the report was a wonderful piece of work.

இட ஒதுக்கீட்டு வரலாற்றில் ஒரு மைல் கல் கம்யூனல் ஜி.ஓ இதனைக் குறித்து ஒரு சாப்டர் முத்துக்குமார் தந்துள்ளார்

ஆனால் மிக முக்கியத்துவம் வாய்ந்த இந்த அரசு ஆவணம் குறித்து இன்னும் விபரமாக சொல்லியிருக்கலாம்.

முதல் வகுப்புவாரி பிரதிநிதித்துவ ஆணை என்ற அந்ததஸ்து கொண்ட அரசாணை

G. O Ms No 1071 of Public Department dated 4th Novemeber 1927

இந்த அரசாணையின் படி ஐந்து விதமான இட ஒதுக்கீடு ஆணையிடப்பட்டது

1. பிராமணர் அல்லாதார் 41.67 %

2. பிராமணர் 16.67%

3. ஆங்கிலோ இந்தியரும் கிறிஸ்துவரும் 16.67%

4. முகமதியர்கள் 16.67%

5. தாழ்த்தப்பட்டவ்ரும் மலைஜாதியினரும் 8.33 %

இந்த அரசாணையில் சில மாற்றங்கள் செய்து 1947 நவம்பரில் ஓர் அரசாணை வெளியானது

G. O Ms No 3437 Public (Services) dated 21-11-1947

இந்த அரசாணையில் தான் பிராமணர் அல்லாதாரில் பிற்படுத்தப்பட்டவர்கள் என தனிப்பிரிவு முதன் முதலில் ஏற்படுத்தப்பட்டது.

இந்திய அரசமைப்புசட்டம் 26 ஜனவரி 1950 முதல் அமுல் செய்யப்பட்ட உடன் இந்த இரண்டு அரசாணைகளும் சக்தி இழந்தன

காரணம் சம்பகம் என்பவர் சென்னை இராஜதானி அரசுக்கு எதிராக தொடர்ந்த வ்ழக்கில் உச்ச நீதி மன்றம் 1951ல் அளித்த தீர்ப்பு

இந்திய அரசமைப்பு சட்டம் ஷரத்து 14 மற்றும் 15ன் கீழ் வழங்கிய சம உரிமைகளுக்கு எதிரான அம்சஙள் கொண்ட அந்த அரசாணைகள்

செயலிழந்தன‌

அரசமைப்புச் சட்டம் அமுலுக்கு வந்த பின் அதற்கு முந்தைய அரசு ஆணைகள் சட்டங்கள் அரசமைப்பு சட்டத்தின் ஷரத்துகளுக்கு

முரண்பட்டவை ஆயின் அவை செல்லாதவை ஆகும்

சம்பகம் வழக்கின் தீர்ப்பு சென்னை இராஜதானியில் போராட்டத்தை தோற்றுவித்தது

இந்த போராட்டங்கள் குறித்து முத்துக்குமார் பதிவு செய்திருக்கலாம்

இந்திய அரசமைப்புச் சட்டத்தின் முதல் திருத்தம் ஏற்படக் காரணமான இந்த போராட்டமும் அதை தொடர்ந்து நாடாளுமன்ற விவாதங்களும் நேருவின் முயற்சியும் நூலாசிரியர் கவனத்திற்கு கொன்டு வர ஆசைப்படுகிறேன்

நேருவின் நாடாளுமன்ற விவாத உரையினை இங்கே குறிப்பிடவும் ஆசைப்படுகிறேன்

The House knows very well and there is not need for trying to hush it up that his particular matter in this particular shape arose because of certain happenings in Madras ( Parliamentary Debates Volume XII - XIII Par 2 Column 9615)

இப்படி சில விடுதல்கள் இருந்தாலும் நூலாசிரியர் முத்துக்குமாரின் முயற்சி மிகவும் பாராட்டுக்குரியது.

மிகக் குறிப்பிட்டு சொல்ல வேண்டுமெனில், சரித்திர நூலாசிரியர் இராமசந்திர குஹா தனது காந்திக்குப் பின் இந்தியாவில் ஒரு செய்தி சொல்லியுள்ளார்.

"ஐரோப்பாவின் சில நாடுகளின் புவியியல் பரப்பை விட அதிக பரப்பளவு கொன்ட தமிழ்நாடு அதன் தலைவர்கள் , இயக்கம் குறித்து விரிவான் புத்தகங்கள் அந்த மொழியில் இல்லை"

இராமசந்திர குஹாவின் ஆதங்கம் முத்துக்குமாரி திராவிட இயக்க வரலாறு நூல் மூலம் தீர்க்கப்பட்டிருக்கிறது என திட்டமாகச் சொல்லலாம்

இது போன்ற ஆராய்ச்சி மனப்பாங்கு கொண்ட இளைஞரை ஊக்குவித்து நூலெழுத வாய்ப்பு தந்து , அதனை செம்மையாக அச்சிட்டு அழகுற வடிவமைத்து வெளியிட்டுள்ள கிழக்கினை மனதாரப் பாராட்டுகிறேன்.

முத்துக்குமாரின் முயற்சியில் விளைந்த இந்த நூல் தொகுதியினை ஒரு ரோஜாவைப் பார்க்கும் ஆர்வமுள்ள சராசரி ஆசாமி போல் இல்லாது அந்த ரோஜா மலர்வதில் அந்த தோட்டக்காரனின் உழைப்பினை ஒரு சகாவாக வியக்கிறேன். உழைப்பு, விடா முயற்சி இதனை இந்த நூலின் எல்லா இடத்திலும் காண முடிகிறது

நேரடியாக பின்னர் வாய்ப்பு கிட்டும் போது பிசிக்கலாகவே செய்கிறேன். இப்போது இணையம் வழியாக செய்கிறேன். எனது கரத்தினை முத்துக்குமாருக்கு நீட்டி கரம் குலுக்குகிறேன். நீங்கள் என் எதிரே இப்போது நிற்பதாக நினைத்து ஒரு சல்யூட் செய்கிறேன் முத்துகுமார்

கிரேட் வொர்க்..